Հենվելով իր Կանոնադրության վրա՝«Հայաստանի տուրիստական ծառայություններ մատուցողների միություն» ՀԿ (Տուրմիություն) կազմակերպում է զբոսավարների և ուղեկցորդների մասնագիտական գիտելիքների ստուգման քննություններ, որոնք ծառայում են մասնագիտական ստանդարտների ապահովման, տեղեկատվության թափանցիկության և մասնագետների իրավահավասարության պաշտպանությանը:
1. Ո՞րն է Տուրմիության քննությունների բնութագիրը
Տուրմիության քննությունը հանդիսանում է պաշտոնապես ճանաչված գիտելիքների ստուգման գործընթաց, որի նպատակն է.
- Հաստատել զբոսավարների և ուղեկցորդների մասնագիտական կարողությունները
- Վերահաստատել անձնական և կառույցային գիտելիքների որակավորում
- Ապահովել մասնագիտական գործողությունների համապատասխանությունը ՀՀ օրենսդրությանը և միջազգային ստանդարտներին
- Ապահովել թափանցիկ և օբյեկտիվ գնահատում
Քննությունը կազմակերպվում է թափանցիկ, հանրային և վերահսկելի ձևաչափով՝ բացառելով քաղաքական կամ տնտեսական կողմնակալությունը:
2. Ո՞վ կարող է մասնակցել Տուրմիության քննություններին
Քննությանը կարող է մասնակցել զբոսաշրջության ոլորտում աշխատանքային փորձ ունեցող, սկսնակ կամ որևէ փորձ չունեցող ՀՀ և օտարերկրյա ցանկացած քաղաքացի։
Մասնակցությունը սկսվում է գրավոր դիմումի ներկայացմամբ Տուրմիության նախագահին՝ ներկայացնելով անձնական տվյալները և մասնագիտական փորձը:
3. Ի՞նչ չափորոշիչներով են անցկացվում Տուրմիության քննությունները
- Քննությունների բովանդակությունը ձևավորվում է Հայաստանի Հանրապետության ճանաչված ակադեմիական և կրոնական հաստատությունների չափորոշիչների հիման վրա՝ Մայր Աթոռ Սուրբ Էջմիածին, ՀՀ Գիտությունների ազգային ակադեմիա, Երևանի պետական համալսարան, Հայաստանի պետական մանկավարժական համալսարան, Ազգային ագրարային համալսարան, Գյումրիի պետական մանկավարժական համալսարան:
- Օգտագործվում են միայն պաշտոնապես հրատարակված դասագրքեր, ձեռնարկներ և գիտական հոդվածներ, որոնք հանրայնորեն հասանելի են:
- Քննությունները չեն ենթարկվում քաղաքական, տնտեսական կամ որևէ արտաքին կողմնակալության:
- Միաժամանակ կիրառվում է Տուրմիության ընտրված չափորոշիչների համակարգ, որը համապատասխանում է ոլորտի լավագույն պրակտիկային:
4. Որո՞նք են քննական առարկաները
Տուրմիության մասնագիտական քննությունը ներառում է հետևյալ հիմնական առարկաները.
- Հայաստանի աշխարհագրություն – բնաշխարհային պայմաններ, բնաշխարհագրական գոտիներ, էկոտուրիզմ
- Հայոց պատմություն – հայ ժողովրդի պատմական զարգացումը, պետականություն, պետական ինստիտուտներ
- Հայ արվեստի և ճարտարապետության պատմություն – մշակութային ժառանգություն, ճարտարապետական հուշարձաններ
- Հայոց Առաքելական եկեղեցու պատմություն – եկեղեցու կառուցվածք, հնագույն ավանդույթներ, կրոնական տոնակարգ
- Կրոնագիտություն – կրոնների պատմություն, հայ եկեղեցու ուսուցում
- Հայ ազգագրություն – ազգային սովորույթներ, ավանդույթներ, տոնակատարություններ
- ՀՀ և Արցախի զբոսաշրջային վայրեր – պատմամշակութային և բնական հուշարձաններ
- Տուրիզմի հիմունքներ – միջազգային և ազգային տուրիզմի ստանդարտներ, անվտանգության կանոններ
- Օտար լեզուների իմացություն – հիմնական նպատակ՝ զբոսավարի խոսքային կարողությունների ստուգում օտար զբոսաշրջիկների հետ աշխատելիս
5. Ինչպե՞ս է անցկացվում քննությունները
- Քննություններն անցկացնում է հատուկ հանձնաժողովը, որում ընդգրկված են Տուրմիության նախագահը, ոլորտային փորձագետներ և հատուկ հրավիրված մասնագետներ:
- Քննությունը կարող է անցկացվել գրավոր և բանավոր ձևաչափով, ըստ դիմողի ցանկության:
- Բանավոր քննությունը տեսանկարահանվում է, ու հետո հասանելի է մասնագիտական հարթակում՝ թափանցիկությունը ապահովելու համար:
- Քննության օրը սահմանվում է դիմումի ներկայացումից 30–40 օրվա ընթացքում:
- Մասնակիցները հնարավորություն ունեն վերահանձնել քննությունը 30 օր անց, եթե արդյունքը բավարար չէ:
6. Ինչպե՞ս են գնահատվում գիտելիքները
- Գիտելիքները գնահատվում են 5-բալանոց սանդղակով:
- Հարցին կրկնակի պատասխանելու կամ սխալվելու դեպքում առանձին փորձը նվազեցնում է գնահատականը մեկ միավորով:
- Ըստ առարկաների արդյունքները զետեղվում են Տուրմիության պաշտոնական կայքում:
- Տվյալների գաղտնիությունն ու թափանցիկությունը երաշխավորված են:
7. Քննությունների արժեքը և վճարները
- Տուրմիության անդամների համար մեկ քննության մասնակցությունը 3.000 (երեք հազար) ՀՀ դրամ է։
- Տուրմիության անդամ չհանդիսացող անձանց համար մեկ քննության մասնակցությունը 10.000 (տաս հազար) ՀՀ դրամ է։
- Վերաքննության արժեքները նույն են
8. Ինչ են տալիս Տուրմիության քննությունները մասնակիցին
- Օբյեկտիվ և թափանցիկ գնահատական՝ ստուգված և փաստագրված
- Էլեկտրոնային և/կամ թղթային հավաստագիր, որը հանդիսանում է պաշտոնական փաստաթուղթ
- Ավելի բարձր վարձատրության և մասնագիտական զարգացման հնարավորություններ
- Պաշտպանություն կոռուպցիոն ռիսկերից և մենաշնորհային դրսևորումներից
- Հիմք շարունակելու գործունեությունը Տուրմիության շրջանակներում
9. Արդյո՞ք տրամադրվում է լիցենզիա
- ՀՀ գործող օրենսդրությամբ՝ լիցենզավորում նախատեսված չէ:
- Տուրմիությունը տրամադրում է միայն էլեկտրոնային հավաստագիր, որը վկայում է մասնագիտական որակավորման մասին:
10․ Որոնք են քննությունների անցնկացման իրավական հիմնավորորմները
Կազմակերպությունը իրավասու է իրականացնել զբոսավարների և ուղեկցորդների որակավորման և գիտելիքների ստուգման գործընթաց` hիմք ընդունելով «Զբոսաշրջության մասին» ՀՀ օրենքը, ՀՀ գործող օրենսդրությունը և «Հայաստանի տուրիստական ծառայություններ մատուցողների միություն» հասարակական կազմակերպության Կանոնադրությունը:
Կազմակերպության կողմից իրականացվող որակավորման գործընթացը հիմնված է ակադեմիական չափորոշիչների, հաստատված ծրագրերի և մասնագիտական գնահատման սկզբունքների վրա։ Քննությունները անցկացվում են մասնագիտական հանձնաժողովի կողմից:
Քննությունների արդյունքները փաստագրվում են, հրապարակվում են Կազմակերպության պաշտոնական կայքում և կարող են հիմք հանդիսանալ մասնագիտական գործունեության իրականացման համար՝ ՀՀ օրենսդրությանը համապատասխան։
Կանոնադրությունը՝ Կազմակերպությունը, որպես հասարակական կազմակերպություն, իրավունք ունի ներկայացնելու մասնագիտական եզրակացություններ, բողոքարկելու որակավորման գործընթացներում արձանագրված խախտումները և պաշտպանելու իր անդամների օրինական իրավունքներն ու շահերը։
14.01.2026 թ
Տես նաև՝ Տուրմիության որակավորման գործընթացը․ իրավական հիմքեր և մոտեցումներ
 ՏՈՒՐՄԻՈՒԹՅԱՆ ՄԱՍԻՆ |
 ԱՆԴԱՄՈՒԹՅՈՒՆ |
